Nafarroako Gizarte Langintzaren Elkargotik deialdi berri bat ireki dugu artikulu teknikoak jasotzeko, ondoren Elkargoaren aldizkarian eta webguneko espazioan zabaltzeko.
Esperientzia profesional berritzaile bat garatzen ari bazara, ikerketa bat egin baduzu, esku-hartze esanguratsu bat burutu baduzu edo Gizarte Langintzaren praktikaren inguruko gogoeta oinarrituak partekatu nahi badituzu, hau izan daiteke zure lekua. Lanbidetik sortutako ezagutzak ikusgarritasuna, zabalkundea eta aitortza izan dezan nahi dugu.
Zure lana ezagutzera emateko bozgorailu baten bila bazabiltza, hemen duzu aukera bat.
Nork har dezake parte?
Nafarroako Gizarte Langintzaren Elkargo Ofizialean elkargokide diren pertsona guztiek bidali ahal izango dituzte artikuluak. Deialdiaren helburua ezagutza profesionalaren ekoizpena eta zabalkundea sustatzea denez, bereziki baloratuko dira Gizarte Langintzaren praktikarekin, esku-hartze sozialarekin, ikerketa aplikatuarekin edo esperientzia profesionalean oinarritutako gogoeta teorikoarekin lotutako lanak.
Zer motatako ekarpenak bidal daitezke?
Izaera teknikoko artikuluak, esperientzia profesionalak, ikerketa aplikatuak, esku-hartzearen analisiak, berrikuspen teorikoak edo Gizarte Langintza diziplina eta lanbide gisa garatzen laguntzen duten gogoeta oinarrituak onartuko dira.
Argitalpena eta zabalkundea
Artikuluaren laburpena Elkargoaren aldizkarian argitaratuko da, lan profesionala zabaltzeko eta ikusgarri egiteko espazio gisa.
Artikulu osoa Elkargoaren webguneko argitalpenen atalean txertatuko da, ezagutza profesionalaren erakunde-biltegiaren parte bihurtuz, kontsultarako eta zabalkunderako eskuragarri.
Horrela, bidalitako lanek ez dute soilik aldizkarian presentzia izango, baizik eta Elkargoaren ezagutza kolektiboaren ondarearen parte ere bihurtuko dira.
Nola parte hartu?
Interesa duten pertsonek deialdiaren oinarri osoak kontsultatu beharko dituzte; bertan zehazten dira baldintza formalak, ebaluazio-irizpideak eta bidalketa-prozesua:
Ezagutza partekatzeko gonbita
Gizarte Langintza partekatutako gogoetatik, praktikaren sistematizaziotik eta eguneroko jardunean egiten dugunaren zabalkundetik ere eraikitzen da. Deialdi honek, hain zuzen ere, horretan lagundu nahi du: esperientzia profesionalak ezagutza eskuragarri, baliagarri eta aitorgarri bihurtzeko espazio komun bat sortzea.
