Nafarroako Gizarte Langintzako Elkargo Ofizialak irailean hartu du “Naomi Feilen Balidazio Metodoaren sarrera. Desorientatuta dauden adineko pertsonekin komunikazioa eta laguntza” prestakuntza, adineko  pertsonei laguntzeko egoera konplexuei aurre egiteko profesionalek tresna berriak eskuratzeko proposamena.

Vincore Kooperatibak emandako prestakuntzan, Javier Irujo Lizaur gizarte-langile eta Validation Training Institute erakundeak Balidazio Metodoan ziurtatutako prestatzaileak parte hartu du. Prestakuntza presentziala izan da, 12 ordukoa, eta irailaren 8an, 10ean eta 15ean egin da.

Ikastaroan zehar, parte-hartzaileek Naomi Feilek garatutako Balidazio Metodoaren® oinarriak ezagutzeko aukera izan dute, desorientatuta dauden adineko pertsonei eta, zenbaitetan, laguntzeko konplexuak izan daitezkeen jokabideei buruzko beste ikuspegi batean sakonduz. Metodoak ikuspegia aldatzea proposatzen du, eta enpatian, autentikotasunean eta entzute aktiboan oinarritutako komunikazioa sustatzeko tresnak eskaintzen ditu.

Prestakuntzak eduki teorikoak eta praktikoak uztartu ditu, eta hainbat gai jorratu dira, hala nola zahartzearen aurrean zaintza, desorientatuta dagoen adineko pertsonarekiko komunikazioa eta harremana, eta haren jokabideak ulertzea. Horrez gain, parte-hartzaileen praktika profesionalarekin lotutako egoera zehatzak eta esperientziak abiapuntu hartuta egin da lana.

Elkargotik Gizarte Langintzaren jardun profesionalarekin lotutako prestakuntza espezializatuaren aldeko apustua egiten jarraitzen dugu, adineko pertsonei errespetuz, ulermenez eta pertsonarengan oinarritutako arretaren bidez laguntzeko baliabide eta estrategia gehiago eskaintzen lagunduko duena.